Nunca choveu que non escampase

Entroido pasado por auga. Esta insistente choiva que aínda continúa canda nós ben merece que lle prestemos un pouco de atención.
Velaí vai un paquetiño de actividades sobre léxico que debedes realizar en equipos cooperativos logo de escoitardes a canción de Bolboreta, neste caso acompañada por Xurxo Souto.

Os recursos que imos empregar son dous:

• Nomes galegos para a chuvia e o chover, en ogalego.eu
• A sabedoría popular. Xa sabedes, toca preguntar na casa.

Actividades/Estruturas 1-2-4 (exercicios 1, 2 e 3) e Dobre folio xiratorio (exercicio 4)
(O paso 1da estrutura 1-2-4 ten que vir feito da casa)

1. Poesía. Na canción menciónase o verso "Chove na casa do probe". A que poeta pertence? Cal é o argumento dese poema? Buscade algunha versión musicada para que a poidamos escoitar na clase.

2.  Ditos e refráns. Na canción aparecen os seguintes: Nunca choveu que non escampara, Mexan por nós e temos que dicir que chove, Nunca choveu a gusto de tod@s. Buscade situacións nas que sexa apropiado empregar as expresións citadas. Poderiades engadir algunha máis?

3. Nomes para a choiva e o chover. Os que se citan na canción son balloada, trebón, barrufada, chaparrón, orballada, chuvisca, roiada e ventisca. Que diferenza hai entre eles? Podedes engadir algún máis que se empregue nas vosas casas?

4. Mural. Elaborade dous murais por equipo, un cos resultados da actividade 2 e outro cos resultados da actividade 3.